گروپ های کاری تخنیکی هفتمین اجلاس کمیسیون مشترک اقتصادی و تجارتی میان افغانستان و تاجیکستان کار شانرا آغاز کردند
محترم پروفیسور محمد همایون قیومی، سرپرست وزارت مالیه و مشاور ارشد مقام عالی ریاست جمهوری در امور زیربناء که در راس یک هیئت عالیرتبۀ دولتی به منظور اشتراک در هفتمین اجلاس کمیسیون مشترک اقتصادی و تجارتی میان افغانستان و تاجیکستان که عازم شهر دوشنبه پایتخت تاجیکستان گردیده است. امروز مؤرخ ۱۳ سرطان ۱۳۹۸ چهار گروپ کاری تخنیکی هفتمین اجلاس متذکره به ریاست مشترک محترم یما شمس، رئیس ادارۀ خط آهن وزارت ترانسپورت و محترم میرزا زاده سهراب، معین نخست وزارت ترانسپورت تاجیکستان کار شانرا آغاز نمودند.
در ابتدای این نشست، جانب تاجیکستان به هیئت افغانستان خوش آمدید گفته و رئیس ادارۀ خط آهن وزارت ترانسپورت افغانستان از جانب مقابل برای میزبانی هفتمین اجلاس کمیسیون مشترک اقتصادی و تجارتی دو کشور اظهار سپاس و تشکری نمود.
این اجلاس متشکل از چهار گروپ کاری ۱.اقتصادی و تجارتی، صنعت، نقلیات و ترانسپورت، گمرک و استندرد سازی، ۲. انرژی، ذخایر آبی و نفت و گاز،۳. زراعت، محیط زیست، رفع حالات اضطراری و بیمه۴. فرهنگ، ورزش و سیاحت، صحت عامه، معارف و تحصیلات عالی می باشد.
گروپ های کاری چهارگانه در رابطه به موضوعات مختلف به بحث های تخنیکی پرداخته و موارد پروتوکول را جهت امضاء میان نماینده گان دو کشور نهائی خواهند ساخت.
