د ۱۴۰۰ مالي کالي ملي بودیجې استماعیه ناستو دوام
د استماعیه ناستو په دوام، د مالیې وزارت مالي مرستیال ښاغلي عبدالحبیب ځدراڼ، په مشرۍ د تلې میاشتې په ۲۸ مه نېټه له بېلابیلو دولتي ادارو سره استماعیه ناستې وشوې.
په دغو ناستو کې چې د مدني ټولنو استازو هم حضور درلود، د لوړو زده کړو او پوهنې وزارتونو همداشان د ټاکنیزو شکایتونو اوریدو خپلواک کمېسیون، د پلازمېنې زون پراختیا خپلواکې ادارې، د احصائیې او معلوماتو ملي ادارې او د علومو اکاډمۍ ناستې ته خپلې بودیجوي اړتیاوې وړاندې کړې، چې د بودیجې د کمېټې له لوري پرې بحث او د نظرونو تبادله وشوه.
د مالیې وزارت مالي مرستیال وویل، چې دولتي ادارې باید د بودیجوي اړتیاوو وړاندې کولو پرمهال د روڼتیا اصل، په غیر اړینو لګښتونو کې سپما، د خلکو ستونزو ته رسېدل او د حکومت پراختیایي لومړیتوبونه په پام کې ونیسي.
د یادونې وړده، چې په استماعیه ناستو کې دولتي ادارې خپلې بودیجوي اړتیاوې وړاندي کوي او د بودیجې کمېټه یې د مالي امکاناتو او د هیواد نافذه قوانینو په رڼا کې د ملي بودیجې په طرحه کې شاملوي.
