د ابونصر فراهي په ګمرک کي د ۳۹ میلیونه افغانیو په ارزښت دوه بابه هنګرونه ګټي اخیستني ته وسپارل سول!
د مالیې وزارت د ګمرکونو لوی ریاست د څه باندي (۳۹) میلیونه افغانیو په ارزښت د فراه ولایت د ابونصر فراهي په ګمرک کي د سوداګریزو توکو د خوندي ساتلو په موخه دوه بابه هنګرونه جوړ او ګټي اخیستني ته وسپارل.
یاد هنګرونه په معیاري ډول جوړ سوي دي، چي هر یو ئې د (۱۰۰) ټنه سوداګریزو توکو د زېرمه کولو وړتیا لري. په دې هنګرونو کي به شاوخوا (۵۰) تنو هیوادوالو ته د کار زمینه هم برابره سي.
د دې هنګرونو د جوړېدو لګښت د مالیې وزارت له پراختیایي بودیجې څخه ورکول سوی او رغنیزي چارې ئې هم د یوه افغاني شرکت له لوري تر سره سوي دي.
د یادوني وړ ده، چي د مالیې وزارت له لوري د هیواد د ګمرکونو د عصري کولو، د سوداګرو له پاره د اسانتیاوو رامنځته کولو او په هیواد کي د سوداګرۍ د لا ودي په موخه ګڼي ګمرکي پروژې پلي سوي دي او یو شمېر ئې د پلي کېدو په حال کي دي.
