د کورنۍ پلټني لوی ریاست د څه کم دوه سوه ادارو پلټنه ترسره کړې ده!
د تلي ۲۸مه ۱۴۰۴ هـ.ل
د مالیې وزارت د کورنۍ پلټني لوی ریاست، چي د ټاکل سویو اصولو له مخي، د دې وزارت د مالي، حسابي او اداري واحدونو د هرراز فعالیتونو د پلټني مسئولیت په غاړه لري، د (۱۴۴۶هـ.ق) کال په ترڅ کي ئې له منظور سوي پلان سره سم د ګمرکونو، مستوفیتونو، مرکزي ریاستونو، واحدونو، مالیاتي حوزو، معلوماتي سیسټمونو، کنټرول مدیریتونو، امارتي املاکو او پراختیايي پروژو په ګډون په ټولیز ډول د (۱۸۵) واحدونو پلټنه کړې ده.
سربېره پر دې د کورنۍ پلټني لوی ریاست، غیر پلاني یعني ځانګړي موضوعات او د مراجعینو شکایتونو له ډلي (۵۱) ځانګړو موضوعاتو او د مراجعینو شکایتونو ته رسېدنه کړې ده.
یاد ریاست د بودیجوي واحدونو د کورنیو پلټونکو د مسلکي ظرفیت لوړوني او اداري پیاوړتیا په موخه د (۱۴۴۶هـ.ق) کال په اوږدو کي د (۲۴) وزارتونو او خپلواکو ادارو کورنيو پلټونکو ته، چي شمېر ئې لسګونه تنه کېږي د پلټني په برخه کي بېلابېل تخصصي روزنیز پروګرامونه هم جوړ کړي دي، چي د دوی په مسلکي روزنه او پیاوړتیا کي ئې رغنده رول لوبولی دئ.
د یادوني ده، چي د مراجعینو شکایتونو او عریضو ته د ښې رسېدني په موخه، د کورنۍ پلټني په لوی ریاست کي د "تجدید نظر" تر عنوان لاندي یوه کمېټه هم رامنځته سوې ده، چي یاده کمېټه د مراجعینو هغو شکایتونو او عرایضو ته رسېدنه کوي، چي د پلټني د پایلو د نه قناعت له امله ئې د کورنۍ پلټني لوی ریاست ته سپارلي وي.
