مالیې وزارت د ملي بودیجې د پلان جوړوني د نوي سیسټم ازمایښتي پړاو پیل کړ!
د تلي ۲۹مه ۱۴۰۴ هـ.ل
د مالیې وزارت ملي بودیجې لوی ریاست، د خزاینو لوی ریاست د سیسټمونو له ریاست سره په همکارۍ، د ملي بودیجې پلان جوړوني یوه نوي سیسټم رامنځته کولو په موخه ګام پورته کړی، چي دا چاره د ملي بودیجې د چمتو کولو او پلانولو په پروسه کي د عصري کولو، ډیجیټل کولو او روڼتیا زیاتولو له پاره یوه هڅه ده.
په لومړيو پړاوونو کي د ملي بودیجې د پلان او ریفورم ریاست، د بودیجې له متخصصینو سره په ګډه، د نوي سیسټم اړتیاوي او ځانګړتیاوي په ګوته او د دې ریاست د ډېټابیس او راپور ورکولو آمریت تخنیکي ټیم د سیسټمونو ریاست تخنیکي ټیم ته ئې د مخکني بودیجوي پلان جوړوني سیسټم روزنه او توضیحي پروګرامونه چمتو کړل؛ ترڅو هغوی له ټولو کاري جزیاتو او شته ستونزو سره بلد سي.
د نوي سیسټم عملی آزمایښتی پړاو د (۱۴۰۴) کال د تلي په (۲۷) پیل او د دواړو ریاستونو تخنیکی ټیمونه به د دې سیسټم تخنیکي کړني، د ګټي اخیستو اسانتیاوي، په معلوماتو کي کره والی او د راپور اخیستو د وړتیا له پلوه و اروي.
دا سیسټم د بودیجوي واحدونو له پاره پرمختللي ځانګړتیاوې وړاندي کوي؛ ترڅو دوی وکړی سي، چي خپل مالي پلانونه په بریښنایي ډول چمتو او د ملي بودیجې لوی ریاست ته ئې واستوي. دا سیسټم د بودیجوي واحدونو، د بودیجې لوی ریاست او د خزاینو لوی ریاست ترمنځ د اړیکو او همغږۍ پروسه هم اسانه او چټکه کوي.
د دې پروژې اصلي موخه د شفافیت زیاتول، د بروکراسۍ کمول او د مالي سرچینو په مدیریت کي د حساب ورکولو پیاوړتیا ده. نوی سیسټم له نړیوالو معیارونو سره سم مطابق دئ او په تدریجي ډول به د هیواد په ټولو بودیجوي واحدونو کي پلی سي. دا اقدام د هیواد د مالي او بودیجوي اصلاحاتو په لور یو مهم ګام او د بودیجې په جوړولو کي د شفافیت او موثریت له پاره د مالیې وزارت ژمنتیا څرګندوي.
