د ۱۴۰۰مالي کال په ملي بودیجه کې د خوست ولایت د خلکو اړتیا وو شاملولو په موخه له دوی سره د حکومت مشورتي ناسته وشوه
د ۱۴۰۰مالي کال په ملي بودیجه کې د خوست ولایت د خلکو اړتیا وو شاملولو په موخه له دوی سره د حکومت مشورتي ناسته د تلې میاشتې په ۱۷ مه نېټه د یاد ولایت په مقام کې وشوه.
په دې ناسته کې د مالیې وزارت مالي مرستیال ښاغلي عبدالحبیب ځدراڼ،د خوست والي ښاغلي محمد صدیق پتمن،، د ولایتي شورای استازو، د علماوو شورای استازو، مدني ټولنو غړو او د یاد ولایت یو شمېر اوسېدونکو ګډون کړی وو.
د مالیې وزارت مالي مرستیال ښاغلي عبدالحبیب ځدراڼ، وویل:" د راتلونکي کال ملي بودیجې په طرحه کې د خوست ولایت د سترو پروژو ترڅنګ د کوچنیو او ټولګټو پروژو لپاره شاوخوا ۸۰ میلیونه افغانۍ په پام کې نیول شوي دي، زموږ هیله داده، چې د خوست ولایت شریف وګړي، د بودیجې ټاکل شوي سقف په پام کې نیولو سره له موږ سره خپلې اړتیاوې او لومړیتوبونه شریک کړي او موږ وکولی شو، دغه اړتیاوې یې د راتلونکي کال ملې بودیجې په طرحه کې شاملي کړو."
ښاغلي ځدراڼ زیاته کړه، چې د مالیې وزارت د مشرتابه له پلان سره سم له خلکو سره د حکومت مشورتي ناستو موخه داده، چې خلک لومړیتوب لرونکي پروژې انتخاب او موږ یې په پام کې نیولو سره وکولی شو د خلکو اړتیاوو ته ورسېږو. نوموړي وويل چې روان کال زموږ همکارانو د هیواد ۱۵ ولایتونو ته سفرونه وکړل څو د خلکو اړتیاوې د بودیجې په طرح کې شاملې کړي. د جلالتماب ولسمشر او د مالیې وزیر صاحب ټینګار داو چې زه په خپله هغو ولایتونو ته سفر وکړم چې زیاتې اړتیاوې لري څو د خلکو ستونزې او اړتیاوې له نږدې واورم او د بودیجې په طرح کې یې شاملې کړم.
د خوست والي ښاغلي محمد صدیق پتمن وویل چې موږ د حکومت د لومړیتوب او سیمه ایزې حکومتولۍ پیاوړتیا په پام کې نیولو سره د بودیجې ترتیبولو په برخه کې د مالیې وزارت د طرحې هر کلی کوو. د خوست والي زیاته کړه، د خوست ولایت اوسېدونکي باید ژمنه وکړي، چې د یادو پروژو د پلي کولو په برخه کې څارنه وکړي او له حکومت سره همکاري وکړي.
د ولایتي شورا منشي ښاغلي قر علي لکڼوال د مالیې وزرات له رهبرۍ څخه د مننې تر څنګ وویل چې د خوښۍ ځای دی چې د بودیجې په ترتیب کې د خلکو نظرونه په نظر کې نیول کیږي او موږ د حکومت او مالیې وزارت د دې کار ستاینه کو.
همدان شان د مالیې وزارت د تخنیکي ډلې له لوري، په دې اړه پریزینټېشن هم وړاندې شو او ګډونوالو ته اړین معلومات ورکول شول. د دې ترڅنګ د خوست ولایت د خلکو نظرونه، وړاندیزونه او اړتیاوې هم واورېدل شوې او د مالیې وزارت مالي مرستیال او د بودیجې عمومي ریاست د تخنیکي ټیم له لوري د دوی پوښتنو ته ځوابونه وویل شول.
د یادونې وړده، چې د مالیې وزارت مالي مرستیال، خوست ولایت ته د خپل سفر په مهال د یاد ولایت له مستوفیت، ګمرک او د غلام خان بندر له صفري نقطې څخه لیدنه وکړه او د خلکو ستونزې یې واورېدې او مسؤلینو ته یې د حلولو لارښوونه وکړه .
