د ګمرکونو لوی رئیس د ننګرهار ولایت له یو شمېر سوداګرو سره وکتل
د مالیې وزارت د ګمرکونو لوی رئیس مفتي عبدالمتین سعید د ګمرکونو او عوایدو معینیت د غونډو په تالار کي د ننګرهار ولایت له یو شمېر سوداګرو سره وکتل.
په دې کتنه کي د عوایدو لوی رئیس معراج محمد معراج، د افغانستان د سوداګرۍ او پانګوني خوني لومړي مرستیال محمد یونس مهمند، د یادي خوني د مدیره پلاوي غړي خان جان الکوزي، د ګمرکونو عملیاتي مرستیال او یو شمېر رئیسانو هم ګډون کړی وو.
په پیل کي د افغانستان د سوداګرۍ او پانګوني خوني لومړي مرستیال د ګمرکونو لوی ریاست له رهبرۍ څخه مننه وکړه، چي د سوداګرو ستونزو ته پر خپل وخت سره رسیدنه کوي. نوموړي د ګمرکونو لوی ریاست له رهبري څخه غوښتنه وکړه چي د ننګرهار ولایت د سوداګرو ستونزو د حل لپاره یاد ولایت ته سفر وکړي.
ور پسې د ننګرهار ولایت د سوداګرو استازي د لیږد فورم، په ګمرکونو کي د تلو فیس او د وارداتي توکو د ګمرکي طی مراحلو په برخه کي د شته ستونزو یادونه وکړه او د حل غوښتنه یي وکړه. همداشان نوموړي په تېرو وختونو کي د نا معتبره T1 د معتبرولو په برخه کي وویل چي سوداګر چمتو دي چي یاد T1 معتبر کړي او په ده برخه کي یي د ګمرکونو لوی ریاست له رهبرۍ څخه غوښتنه وکړه چي جریمې ور معاف او هغه سوداګر چي زیات T1 یي نا معتبره دي په څو قسطونو کي د تحویلولو موافقه ور سره وکړي.
د ګمرکونو لوی رئیس د دوی د ستونزو له اورېدو وروسته وویل: سوداګرو ته په ګمرکونو کي اسانتیا برابرول زموږ لومړیتوب دئ او هڅه مو داده چي ګمرکي طی مراحل لا چټک کړو. نوموړي د لیږد فورم او د تلو فیس په اړه وویل چي یاده ستونزه به ژر حل شي. ښاغلي سعید د نا معتبره T1 په برخه کي وویل چي سوداګر دي په روان کال کي خپل اصل باقیات تحویل کړي او د جریمو په برخه کي د حکومت پرېکړي ته په تمه سي.
د ګمرکونو لوی رئیس د ننګرهار ولایت سوداګرو ته ډاډ ورکړ، چي د سوداګرو د نورو ستونزو د هواري په موخه به ډېر ژر د ګمرکونو لوی ریاست با صلاحیته پلاوی یاد ولایت ته سفر وکړي.
