د هیواد په ټولو ګمرکونو کي پر تازه مېوو او سبزیو د لېږد فورم اخیستل لغوه سو
د مالیې وزارت د ګمرکونو لوی ریاست په وړاندیز او د مالیې وزارت مقام په منظورۍ سوداګرو ته د اسانتیا رامنځته کولو او د تازه مېوو او سبزیو له خرابوالي څخه د مخنیوي په موخه د هیواد په کچه په ټولو ګمرکونو کي پر سریع الفساد (ژرخرابېدونکو) اموالو د لیږد فورم اخیستل لغوه سو.
د محصول سوو توکو د لېږد کړنلارې په (۱۱) مي مادې کي راغلي چي وارداتي سریع الفساد توکي د اصلي اظهار پاڼي له مخې تر ۱۵ ورځو پوري نورو ولایتونو ته د لېږد له فورم پرته د انتقال اجازه لري، خو دا چي میوه او سبزي په سرحدي ګمرک کي له پړاونو ترسره کولو وروسته په ولایتونو کي په نورو موټرو کي بارګیري کیږي، چي له دې سره د موټر نمبر پلېټ هم بدلون مومي او بیا د لېږد فورم ته اړتیا پیدا کوي، د یادي ستونزي د حل لپاره د ګمرکونو لوی ریاست رهبري پرېکړه وکړه چي په ټولو ګمرکونو کي د مېوو او سبزیو لپاره د لیږد فورم اخیستل لغوه کړي.
د یادوني وړ ده چي د ګمرکونو لوی ریاست په دې هڅه کي دی، چي د سوداګرو ټولو ستونزو ته د نافذه قوانینو په رڼا کي رسېدنه وکړي او په ګمرکونو کي د دوی لپاره لا اسانتیاوي برابري کړي.
