د ګڼو هم مسیره پروژو د ډیزاین، تحلیل او ارزوني په تړاو د همغږۍ غونډه جوړه سوه!
د ګڼو هم مسیره پروژو د ډیزاین، تحلیل او ارزوني په تړاو غونډه د مالیې وزارت د پالیسۍ معین انجنیر سلطان محمد زبیر په مشرۍ او د مخابراتو او معلوماتي ټکنالوژۍ د تخنیکي او پالیسۍ معین پوهنیار احمد مسعود لطیف رای، د کابل ښاروالۍ استازو او یادو وزارتونو د مسؤلینو په ګډون په مالیې وزارت کي جوړه سوه.
په دې غونډه کي د ګڼو هم مسیره پروژو په ځانګړي ډول د نوري فایبر پروژې د پلي کولو او غوره اجراء کولو په اړه خبري اتري وسوې.
په دغه غونډه کي، چي د متعددو او نوري فایبر پروژو د پلي کولو په موخه د یادو بنسټونو د لا همغږۍ له پاره جوړه سوې وه، د کابل ښاروالۍ له لوري د ګڼو او هم مسیره پروژو د پلي کولو په لړ کي د فعاليتونو پر ترسره کولو، تحليل، ارزوني، کیندني او د مخابراتو او معلوماتي ټکنالوژۍ له لوري د مخابراتي شرکتونو له پاره د واحد سټنډرډ ټاکڼي په اړه بحث وسو.
د مالیې وزارت د پالیسۍ معین د مخابراتو او معلوماتي ټکنالوژۍ له وزارت او کابل ښاروالۍ سره د هر ډول همکارۍ ژمنه وکړه او د چارو د ښه تطبیق او د نوري فایبر پروژو د پلي کولو له پاره د زمینې برابرولو په موخه د مشخصاتو او تخنیکي تحلیل په برخه کي د یادو بنسټونو د همکارۍ او همغږۍ غوښتونکی سو؛ ترڅو د نوري فایبر پروژې په ټاکلو مسیرونو کي په غوره او اغېزمنه توګه پلي سي.
