د بیلټي موادو مېکانیزم لغوه شو
د عوایدو او ګمرکونو مرستیال ښاغلي عبدالولید تمیم، د وږې میاشتې په ۵ مه نېټه د سوداګرۍ خونو او پانګونې، صنایع او کانونو او نړیوالې سوداګرۍ له استازو سره د خپل کار په دفتر کې وکتل.
په دې کتنه کې چې د عوایدو او ګمرکونو لویو رئیسانو هم ګډون کړی وو، د بیلټي موادو مېکانیزم په لغوه کېدو هر اړخیزې خبرې وشوې او پرېکړه وشوه، چې له دې وروسته په بیلټي توکو پوري تړلي د تعرفوي کودونو تګلاره، مېکانیزم او اوسنۍ قیمت ګذاري د باور وړ نه ده، بلکه د دې پرځای دي ملي سوداګر او واردوونکي، ټول مواد د ګمرکونو له قانون سره سم په سرحدي او محصولي ګمرکونو کې اظهار کړي.
همدا شان محصولي ګمرکونو ته دنده وسپارل شوه، چې محمولې دي د ګمرکونو له قانون سره سم سل سلنه تشریح کړي او په محموله کې د شته جنسونو له منځه دي د تعرفې له لوړ کوده تعیین شوی محصول د دولت خزانې ته وسپاري.
د یادونې وړده، چې ملي سوداګر او د بیلټي موادو واردوونکي د روان کال وږې میاشتې له ۵ مې نېټې فرصت لري، چې بیلټي واردات ودروي، ځکه د یاد معیاد له ختمېدو وروسته به توکې د ګمرکونو له قانونه سره سم په بشپړه توګه تشریح شي.
