د مالیې او سوداګرۍ وزارتونو ترمنځ تخنیکي ناسته ترسره سوه
د مالیې او صنعت او سوداګرۍ وزارتونو ترمنځ په افغانستان کي د پانګوني د برانډ پروژې د معرفي کولو تخنیکي ناسته د مالیې وزارت په خیبرهال کي ترسره سوه.
په دې غونډه کي د مالیې وزارت د عوایدو لوی رئیس معراج محمد معراج، د دغه وزارت د مقام ستر سلاکار خلیل الله صاحبزاده، د صنعت او سوداګرۍ وزارت د پراختیا او له پانګوالو د ملاتړ رئیس صبغت الله اخندزاده، د دغه وزارت له سوداګرو څخه د ملاتړ آمر میر اشرف احمدي د دواړو وزارتونو یو شمېر رئیسانو او کارکوونکو ګډون کړی وو.
په پیل کي د صنعت او سوداګرۍ وزارت د پراختیا او پانګوني د ملاتړ رئیس صبغت الله اخندزاده په افغانستان کي د پانګوني د کمپاین پېژندني په اړه ټولیز معلومات وړاندي کړل او زیاته یې کړه، چي د پانګوني جلب او جذب د ټولو سکتوري وزارتونو ملاتړ ته اړتیا لري.
ورپسې له پانګوني څخه د ملاتړ آمر میر اشرف احمدي د صنعت او سوداګرۍ وزارت د فعالیتونو، د بهرنۍ پانګوني د ارزښت، د پانګوني بهیر، له پانګوالو څخه د ملاتړ او د مالیې وزارت د ونډي په اړه د غونډي ګډونوالو ته هر اړخیز پریزنټیشن وړاندي کړ.
د دې ناستي په لړ کي د مالیې وزارت ستر سلاکار خلیل الله صاحبزاده د غونډې ګډونوالو ته د ښه راغلاست ترڅنګ وویل: هیله لرو چي د پانګوالو د ستونزو د هوارۍ او هماهنګۍ لپاره یوه واحده مرجع رامنځ ته سي او همدارنګه د صنعت او سوداګرۍ وزارت له مسئولینو هیله مند یو، چي له شته فرصتونو څخه ګټه پورته او په زیربنايي موضوعات او د پانګوالو د مالیې پر ورکړه خپل تمرکز زیات کړي.
د مالیې وزارت د عوایدو عمومي رئیس معراج محمد معراج په خپلو خبرو کي وویل: د مالیې او سوداګرۍ وزارتونه هغه ځانګړي سکټوري وزارتونه دي، چې د پانګوالو لپاره زیاتي اسانتیاوې برابرولای سي او موږ چمتو یو چې د مالیاتو د ورکړي په برخه کي پانګوالو ته لا ډېري اسانتیاوي برابري کړو.
د يادوني وړ ده، چي د ناستي په پاى کي د يادو وزارتونو د مسوولينو ترمنځ هر اړخيز بحث او مهمي پرېکړي هم وسوې.
