د مالیې او کورنیو چارو وزارتونو د کورنۍ پلټني لویو رئیسانو د خپلمنځي همغږۍ په موخه سره کتلي
د وږي ۲۵مه ۱۴۰۴هـ.ل
د کورنیو چارو وزارت د کورنۍ پلټني لوی ریاست په غوښتنه د ښې همغږۍ، تجروبو شریکولو او د دوامداره مسلکي او کاري همکاریو د رامنځته کولو په موخه د مالیې او کورنیو چارو وزارتونو د کورنۍ پلټني لویو ریاستونو ترمنځ د مالیې وزارت د کورنۍ پلټني لوی رئیس الحاج ملا عبدالهادي ابرار او د دې ریاست اړوندو رئیسانو او د کورنیو چارو وزارت د کورنۍ پلټني لوی رئیس پاسوال مفتي محمد سالم عبرت په ګډه مشرۍ او د دغه ریاست د رئیسانو په ګډون لومړنۍ ناسته د ملي بودیجې لوی ریاست په کنفرانس خونه کي وسوه.
په دې ناسته کي د کورنيو چارو وزارت د کورنۍ پلټني لوی ریاست پلاوي د یو شمېر دوه اړخیزه موضوعاتو د بحث ترڅنګ د مالیې وزارت د کورنۍ پلټني له لوی ریاست څخه وغوښتل، چي د کارکوونکو د مسلکي روزني او ظرفیت لوړوني په برخه او همدارنګه د چارو د اصلاح په موخه د کورنیو چارو وزارت د کورنۍ پلټني لوی ریاست سره هراړخیزه همکاري وکړي.
د یادي ناستي په پای کي پرېکړه وسوه، چي راتلونکې غونډه به د کورنیو چارو، مالیې او ملي دفاع وزارتونو د کورنۍ پلټني مسئولینو ترمنځ وسي او د کاري کمېټو په رامنځته کولو سره به د یادو مواردو د عملي لارو چارو له پاره اړین ګامونه پورته سي.
