د مالیې وزارت د ګمرکونو دویمه رتبه بستونو شارټ لسټ پیل شو
د مالیې وزارت او اداري اصلاحاتو او ملکي خدمتونو خپلواک کمېسیون په ګډه همکارۍ د مالیې وزارت د ګمرکونو دویمه رتبه بستونو شارټ لسټ د لړم میاشتې په لومړۍ نېټه پیل شو.
دغه پروګرام چې په همدې مناسبت ترسره شو، د ګمرکونو عمومي رئیس ښاغلي خلیل الله صالح زاده، د مالیې وزارت بشري سرچینو رئیس ښاغلي محمد غلام ملاخېل او د اداري اصلاحاتو او ملکي خدمتونو خپلواک کمېسیون استازي پکي حضور درلود، د ګمرکونو عمومي رئیس وویل، چې مالیې وزارت په لومړي ځل د اداري اصلاحاتو له خپلواک کمېسیون سره په ملتیا د (ننګرهار، نیمروز، کابل، خوست، کندهار، فراه، هرات، اقینې او کندوز) ولایتونو د ګمرکونو د ریاستونو دویمه درجه ۹ بستونه ازادې سیالۍ ته سپارلي. هغه زیاته کړه چې د مالیې وزارت د مشرتابه له پرېکړې سره سم باید وړ، ریښتینې او ژمن کسان دغو ریاستونو ته وګمارل شي او د ګمارنې په پروسه کې هیڅ ډول مداخله نه ده شوې او ازموینه به په رڼه توګه ترسره شي.
د اداري اصلاحاتو او ملکي خدمتونو خپلواک کمېسیون کمیشنر ښاغلي حشمت الله هاشمي، دغه پروسه له نږدې ولیده او ویې ویل، چې په مرکز او ولایتونو کې د لوړ پوړو بستونو ازادې سیالۍ ته د سپارلو په لړۍ کې موږ د لومړي ځل لپاره ازادې سیالۍ ته د مالیې وزارت د کلیدي بستونو سپارلو شاهدان یو. موږ د خپلو دندو مطابق دغه بهیر پیل کړی او د اصلاحاتو راوستو په لړ کې ورته په نېک نظر ګورو. زموږ هڅه دا ده، چې له رسنیو او مدني ټولنو سره په همغږۍ روڼتیا رامنځته کړو، څو وړ او ژمن کسان اړوندو بستونو ته لاره ومومي.
د یادونې وړده، چې په دې بستونو کې ۱۸۴۱ کسانو غوښتنې وړاندي کړي، چې د شارټ لسټ بهیر به څلور ورځې دوام وکړي او پایلې به یې د مالیې وزارت او اداري اصلاحاتو او ملکي خدمتونو خپلواک کمېسیون د ویب سایټ او ټولنیزو پاڼو له لارې له خلکو سره شریکې شي.
