د مالیې وزارت سرپرست: اقتصادي ودې او مالي ځان بسیاینې ته د رسېدو لپاره د حکومت او خصوصي سکټور همکاري او همغږي حتمي اړتیا ده
د مالیې وزارت سرپرست او د زېربنا په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، د تلې میاشتې په ۲۱ مه نېټه د سوداګریزو توکو له یو شمېر واردوونکو سره چې د تورخم له لارې سوداګریز توکې را واردوي، وکتل.
په دې کتنه کې چې د عوایدو او ګمرکونو معینیت سرپرست ښاغلي عبدالولید تمیم او د سوداګرۍ خونې سوداګریز مرستیال ښاغلي محمد یونس مومند، هم شتون درلود واردوونکو د ستونزو روښانه کولو ترڅنګ وویل، چې دوی د نافذه قوانینو، ګمرکي کړنلارو او ټاکل شویو تعرفوي کودونو له سل سلنې پلي کیدو سره کومه ستونزه نه لري، ولي دغه قوانین باید د هیواد په ټولو محصولي ګمرکونو کې یو ډول پلي شي.
د مالیې وزارت سرپرست وویل، چې اقتصادي ودې او مالي ځان بسیاینې ته د رسېدو لپاره د حکومت او خصوصي سکټور ترمنځ همکاري او همغږي اړینه ده. ښاغلي قیومي زیاته کړه، چې واردوونکي باید په ټول هیواد کې نافذه قوانینو ته ژمن وي او خپل توکې دي سل په سله او له قانون سره سم تشریح کړي. د مالیې وزارت د نافذه قوانینو پلي کولو ته ژمن ده او هیڅ ډول استثناء او زور ته غاړه نه ږدي.
د مالیې وزارت سرپرست وویل، چې مالیې وزارت به د واردوونکو د ستونزو حلولو په برخه له قانون او مقرراتو سره سم هر اړخیزه همکاري وکړي.
په پای کې پرېکړه وشوه، چې واردوونکي، د سوداګرۍ او صنایع خونه او د عوایدو او ګمرکونو معینیت دي د تورخم په دروازه کې د شته ستونزو حلولو په موخه بېړۍ ناسته وکړي، څو ستونزې یوه په یوه وڅېړل شي او د حل لپاره یې لارې ولټول شي.
