د مالیې وزارت سرپرست د انګلستان نړیوالو پراختیایي مرستو ادارې (DFID) له عمومي رئیسې سره د سولې پروسې په اړه خبرې وکړې
د مالیې وزارت سرپرست او د زېربنا په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، د نړیوال بانک او پیسو نړیوال صندوق ۲۰۱۹ کال پسرلنۍ ناستو کې د ګډون په مهال د څنډو ناستو په دوام د وري میاشتې په ۲۳ مه نېټه د انګلستان نړیوالو پراختیایي مرستو ادارې (DFID) له عمومي رئیسې اغلی لینډي کامرون، سره وکتل.
په دې کتنه کې دواړو لوریو د سولې پروسې په پرمختګ، د دې پروسې په ښه مدیریت، د افغانستان په خلکو او سیمې په هیوادونو یې اغېز، په ولایتونو کې له سېلاب ځپلو او کورنیو بې ځایه شویو سره د انګلستان په مرستو او نورو اړوندو مسائلو په تړاو خبرې وکړې.
د مالیې وزارت سرپرست د انګلستان نړیوالو پراختیایي مرستو ادارې له مرستو څخه مننه وکړه او د یادې ادارې عمومي رئیسې له افغانستان سره د دوامداره مرستو ډاډ ورکړ.
