د مالیې وزارت سرپرست د ولسي جرګې په استجوابیه ناسته کې ګډون وکړ
د مالیې وزارت سرپرست محمد خالد پاینده، نن د ولسي جرګې په عمومي استجوابیه ناسته کې ګډون وکړ، چې د ولسي جرګې رئیس میر رحمان رحماني په مشرۍ، ترسره کېده.
د مالیې وزارت سرپرست په دې ناسته کې د ولسي جرګې غړو ته د ملي عوایدو راټولېدو، په عوایدي سرچینو کې د اصلاحاتو په پلي کولو، له اداري فساد سره د مبارزې، د ښوونکو په شمول د ټیټ پوړو دولتي کارکوونکو د معاشونو لوړېدو او د منځني کال د بودیجې له ارزونې ورسته یې د تفاوت ورکړي او نورو ورته مسایلو په تړاو معلومات ورکړل.
د مالیې وزارت سرپرست، په دې ناسته کې په ولسي جرګه کې د خلکو استازو ته روښانه کړه، چې د مالیې په وزارت کې یې د سرپرستۍ د چارو له پیل څخه تر دې دمه ډېری لوړ پوړي مسؤلین او کار کوونکي چې په فساد کې ښکېل وو او کره اسناد یې پرې موندلي، عدلي او قضایي ارګانونو ته ور معرفي کړي دي.
