د مالیې وزارت سرپرست د څو اړخیزه پانګونې د تضمین ادارې له مرستیال سره د افغانستان اقتصادي ځان بسیاینې د پانګونې په بسته کې د کرنې او انرژۍ د شاملو پروژو په تړاو بحث وکړ
د مالیې وزارت سرپرست او د زېربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، د تلې میاشتې په ۲۶ مه نېټه د امریکا متحده ایالتونو په واشنګټن ډیسي کې د نړیوال بانک او پیسو نړیوال صندوق مدیره پلاوي د کلنۍ ناستو په څنډو کې د څو اړخیزه پانګونې د تضمین ادارې (MIGA) له مرستیال ښاغلي ویجای ایر، سره وکتل.
په دې کتنه کې د مالیې وزارت سرپرست، د مزار شریف ګازي برېښنا بیمې په خاطر د میګا له ادارې مننه وکړه او دواړو لوریو د افغانستان اقتصادي ځان بسیاینې د پانګونې بستې، په دې بسته کې شاملو پروژو ته د بهرنۍ پانګونې جلبولو، د کجکي برېښنا بند لپاره په پانګونه او نورو اړوندو مسایلو په تړاو خبرې وکړې.
د څو اړخیزه پانګونې د تضمین ادارې، د افغانستان اقتصادي ځان بسیاینې د پانګونې په بسته کې د کرنې او انرژۍ پروژو په بېمه کولو لېوالتیا وښوده.
د مالیې وزارت سرپرست وویل، چې ډېر ژربه په نوموړي بسته کې د ټولو شاملو پروژو بشپړ جزیات په واک کې ورکړي.
د یادونې وړده، چې د څو اړخیزه پانګونې تضمین اداره، د نړیوال بانک خصوصي سکټور د پراختیا یوه برخه ده، چې موخه یې د سترې پانګونې لپاره د فرصتونو رامنځته کول، د خصوصي پانګونې بسیج کول او پایداره او ځواب ویونکي خصوصي سکټور د پرمختګ په موخه د نړیوالې پراختیا سازمان (IDA) له غړو هیوادونو سره مرسته کول دي.
