د نیمروز په ګمرک کي د ۳۲ میلیونه افغانیو په ارزښت د موټرونو تمځای جوړ سو!
د مالیې وزارت د ګمرکونو لوی ریاست د څه باندي (۳۲) میلیونه افغانیو په ارزښت د نیمروز ولایت په ګمرک کي د موټرونو له پاره تمځای جوړ او ګټي اخیستني ته وسپاره.
دغه تمځای په (۴،۵) جریبه ځمکه کي جوړ سوی او پر یوه مهال د (۱۳۰) لویو باروړونکو موټرونو د درېدو ظرفیت لري. د موټرونو په دې تمځای کي په اساسي ډول کانګرېټ اچونه سوې او د ټولو لازمو اسانتیاوو درلودونکی دئ، چي ورسره به موټر چلوونکو، سوداګرو او د ګمرک کارکوونکو ته په بېلابېلو برخو کي ګڼي اسانتیاوي برابري سي.
د دغي پروژې مالي لګښت د مالیې وزارت له پراختیایي بودیجې څخه ورکړل سوی او چاري ئې هم د یوه افغاني شرکت له لوري په (۹) میاشتو کي بشپړي سوې. همدارنګه د (۵) سوه زره افغانیو په ارزښت د نیمروز ولایت ګمرک د هنګرونو د بیارغولو پروژه هم بشپړه او ګټي اخیستني ته وسپارل سوه.
