د هیواد ګمرکونو د مالي کال تر پای ته رسېدو مخکي خپل عوایدي هدف بشپړ کړ
د مالیې وزارت له لوري د هیواد په ټولو ګمرکونو کي د رامنځته سوو اسانتیاوو، پرمختیاوو، رڼو عوایدو راټولولو، تخصصي کاري ټیم او دندي ته د ژمنتیا په پایله کي ګمرکونو د مالي کال تر پای ته رسېدو مخکي خپل عوایدي هدف بشپړ کړ.
د مالیې وزارت له لوري د ګمرکونو لوی ریاست ته د (۱۴۰۱) مالي کال لپاره د (۱۰۵) میلیارډه افغانۍ عوایدو کلنی هدف ټاکل سوی و، چي د ګمرکونو لوی ریاست وکولای سول یاد هدف د روان مالي کال د کب د میاشتي په (۱۴) مه نېټه بشپړ کړي او تر (۱۰۵) میلیارډه افغانیو لوړ ګمرکي عواید ترلاسه کړي.
په داسي حال کي، چي په (۱۴۰۰) مالي کال کي ترلاسه سوي ګمرکي عواید (۶۴) میلیارډه افغانۍ او په (۱۳۹۹) مالي کال کي له ګمرکونو څخه (۷۲) میلیارډه افغانۍ عواید ترلاسه سوي وه. د اسلامي امارت له بیا حاکمیت څخه مخکي د هیواد ګمرکونو هیڅ وخت د ماليې وزارت لخوا ورکول سوی هدف نه دي پوره کړئ، دا لومړی ځل دی چي د هیواد له ګمرکونو څخه په لوړه کچه عواید را ټولېږي او آن دا چي تر خپل ټاکل سوي هدف لوړېږي.
د یادوني وړ ده، چي د روان (۱۴۰۱) مالي کال د وروستۍ میاشتي (۱۵) ورځي پاته دي او د روان مالي کال ترپایه به ګمرکي عواید له (۱۱۰) میلیارډه افغانیو څخه لوړ سي.
