د ولایتي مستوفیتونو او ګمرکونو ۱۲۲ تنه کارکوونکو ته جوړ سوی روزنیز پروګرامونه پای ته ورسېد!
د مالیې وزارت د ګمرکونو او عوایدو ملي اکاډمۍ له کلني تدریسي پلان سره سم، د مستوفیتونو د مالیه ورکونکو خدمتونو برخي (۴۰) تنه کارکوونکو او د نیمروز ګمرک (۸۲) تنه کارکوونکو ته د ګمرکونو او عوایدو په ملي اکاډمۍ کي د «مسلکي کولو» تر سرلیک لاندي (۱۶) ورځینی روزنیز پروګرامونه د یو لړ مراسمو په ترڅ کي د تصدیق پاڼو په وېشلو سره پای ته ورسېدل.
په دغه پروګرام کي د مالیې وزارت د عوایدو لوی ریاست عملیاتي مرستیال انجینر خان محمد ذاکر، د دعوت او ارشاد ریاست مدرس مولوي وسیم احمد احمدي، د عوایدو او ګمرکونو د ملي اکاډمۍ آمر بلال احمد احدي او د یاد آمریت ښوونکو ګډون کړی وو.
د عوایدو لوی ریاست عملیاتي مرستیال وویل، چي کارکوونکي باید له دې روزنیز پروګرام څخه ترلاسه سوي زده کړي په خپلو ورځینو چارو کي په غوره بڼه پلي کړي او د خپلو ښوونکو او مشرانو له اوامرو څخه بشپړ اطاعت وکړي.
د دعوت او ارشاد ریاست مدرس په خپلو خبرو کي وویل، چي ټول کارکوونکي باید د نېکو اخلاقو څخه برخمن او خپل سیرت او صورت په شریعت برابر کړي، سربېره پر دې خپلي چاري په پوره ایماندارۍ ترسره او له ولس سره نېک چلند وکړي.
د یادوني وړ ده، چي په دغه روزنیز پروګرام کي د مستوفیتونو د مالیه ورکوونکو خدمتونو برخي کارکوونکو ته د ګمرکونو او عوایدو ملي اکاډمۍ آمریت د مسلکي ښوونکو له لوري مالیاتي قوانین، طرزالعملونه، مالیاتي محاسبات، مالیاتي اظهارلیکونه او د سیسټمونو برخي تدریس سوې دي او د نیمروز ګمرک کارکوونکو ته د تعرفې، بیي ټاکني، لابراتور، ګمرکي قوانینو او اسیکوډا سیسټم په برخه کي روزنه ورکړل سوه.
