د کرونا ویروس سره د مبارزې او عامه هوساینې په برخو کې د افغانستان حکومت مالي بسته

د افغانستان حکومت له کرونا ویروس سره د اغیزمنې او رڼې مبارزې، له خلکو څخه د ملاتړ او عامه هوساینې په موخه د ۸۹.۶ میلیارده افغانیو بسته چمتو کړی چې یاده بسته کې  د عوایدي سرچینو او د لګښتونو پلان شامل دی.

عوایدي سرچینې

د لګښتونو پلان

د یادې بستې له جملې څخه ۳۳.۱ میلیارده افغانۍ له عادي او پراختیایې بودیجې څخه تعدیل شوی چې ۲۹.۷ میلیارده افغانۍ کې له کرونا ویروس سره د مبارزې او ۳.۴ میلیارده افغانۍ یې عملیاتي او پراختیایې برخو ته ځانګړي شوي دي چې د تصویب لپاره به پارلمان ته ولیږل شي. پاتې نوره وجوه چې بستې کې شامله ده د ملي بودیجې له لارې په غیر اختیاري ډول د مرسته کوونکو هیوادونو او بنسټونو سره په همکارۍ او همغږۍ ولګول شي.

له نویو تعدیلاتو سره په ټوله کې ملي بودیجه چې د ۱۳۹۹ مالي کال په پیل کې ۴۲۸ میلیارده افغانۍ وو، ۴۴۹.۴ میلیارده افغانیو ته به ورسیږي.

د یادونې وړ ده چې مالیې وزارت د وجوې د لګښتونو په برخه کې د روڼتیا او حساب ورکولو اصل ته ژمنتیا لري او د دې برخې د لګښت روڼتیا په برخه کې د پارلمان، د پلټنې عالي ادارې او نورو اړوندو څارونکو ادارو سره هر اړخیزه همکاري کوي. نور بنسټونه لکه مدني ټولنې او رسنۍ اطلاعاتو ته د لاسرسي قانون له سره سم کولی شي له دې پروسې څخه څارنه وکړي.

همداشان د ۲.۳ میلیارده افغانیو لپاره چې ولایتونو ته ځانګړې شوي دي مالیې وزارت د سېمه ایزو ارګانونو خپلواکې ادارې سره په ګډه طرزالعمل ترتیب کړی چې د دې طرزالعمل د اوومې مادې سره سم د نظارت شورا د ( ولایتي شورا او یا د ولسي جرګې، مدني ټولنې، ښاروالۍ او یا ناحیې، ولایت، مستوفیت، خصوصي سکټور غړي او د سېمې له رسنیو څخه یو نفر) څخه جوړه شورا ده.

 همداشان د یادونې وړ ده چې په یاده بسته کې د عامه هوساینې وجوه د افغانستان بیا رغونې وجهي صندوق له لوري تمویلیږي چې نړیوال بانک یې مدیریت کوي. د عامه هوساینې بسته د افغانستان حکومت او نړیوال بانک له لوري په ګډه چمتو کیږي چې جزئیات به یې د چمتو کیدو وروسته له خلکو او رسنیو سره شریک شي.