د کوچنیو مالیه ورکوونکو ریاست نویو ګومارل سوو کارکوونکو ته پنځه ورځنی روزنیز ورکشاپ پیل سو
د مالیې وزارت د بشري سرچینو ریاست او عوایدو لوی ریاست په همغږۍ د کوچنیو مالیه ورکوونکو ریاست نویو ګمارل سوو کارکوونکو ته د وړتیا لوړوني په موخه د مالیاتي قوانینو او سګټاس په برخه کي پنځه ورځنی روزنیز ورکشاپ پیل سو.
د ورکشاپ په پرانیستې ناسته کي، چي د عوایدو او ګمرکونو په ملي اکاډمۍ کي ترسره سوه د مالیې وزارت د بشري سرچینو رئیس ښاغلي مولوي احمد شاه «شاکر»، د کوچنیو مالیه ورکونکو رئیس ښاغلي محمد هاشم «هاشمي» د عوایدو او ګمرکونو اکاډمۍ آمر ښاغلي بلال احمد «احدي» ګډون کړی وو.
د دې ناستي په پرانیستې وینا کي ښاغلي «شاکر» وویل، چي موږ او تاسو په اسلامي نظام کي دنده ترسره کوو؛ نو د اسلامي نظام له شعار سره باید ځان برابر کړو، چي دا شعار عدل، رښتینولي، له فساد سره مبارزه او د ولس سره نېک چار چلند کول دي، ترڅو ولس پر موږ باور وکړي او په ګډه د هیواد آبادۍ لپاره سره را ټول سو.
د یادوني وړ ده، چي دا ورکشاپ به پنځه ورځي دوام وکړي.
