د ګمرکونو او عوایدو معین د نفتي موادو د ارزوني په موخه فراه ولایت ته سفر وکړ!
د مالیې وزارت د عوایدو او ګمرکونو معین الحاج مفتي عبدالمتین سعید، چي په رسمي سفر فراه ولایت ته تللی، د فراه له والي الحاج مولوي غوث الدین رهبر سره د کتني ترڅنګ د یاد ولایت د ګمرک او مستوفیت چاري هم لیدلي.
له نوموړي سره، چي د یاد معینیت د نفتي موادو د کنټرول او کیفیت رئیس قاري محمد ابراهیم خلیل هم ملتیا کوي د فراه له والي سره په کتنه کي د بې کیفیته تېلو د واردولو پر مخنیوي او په دې برخه کي د شته ستونزو پر حلولو، سوداګرو ته د لازمو اسانتیاوو پر رامنځته کولو، د دې ولایت د عوایدو پر زیاتوالي او یو شمېر نورو اړینو موضوعاتو بحث او خبري وکړې.
نوموړي د ابو نصر فراهي ګمرک او د فراه ولایت د مستوفیت له چارو څخه د لیدني پر مهال د یادو ادارو مسئولینو او کارکوونکو ته د لازمو اسانتیاوو د رامنځته کولو، د چارو د لا ښه والي په موخه د کارکوونکو او مسئولینو تر منځ د همکارۍ او همغږۍ د لا زیاتولو او یو شمېر نورو موضوعاتو په اړه سپارښتني هم وکړې.
د یادوني وړ ده، چي د ګمرکونو او عوایدو معین په دې سفر کي د فراه ولایت د کنټرول او کیفیت آمریت له پاره نوی آمر هم کارکوونکو ته ور معرفي کړ.
