له متحده عربي اماراتو سره د همکاریو هوکړه لیک پلي کولو او عملي کولو د همغږۍ ناسته وشوه
د مالیې وزارت سرپرست او د زېربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، په مشرۍ د وري میاشتې په ۱۹ مه نېټه له متحده عربي اماراتو سره د همکاریو هوکړه لیک پلي کولو او عملي کولو په تړاو د همغږۍ ناسته وشوه.
په دې ناسته کې چې د اوبو او انرژۍ وزارت سرپرست ښاغلي محمد ګل خُلمي، د لوړو زده کړو، پوهنې، صنعت او سوداګرۍ، کرنې مالدارۍ او اوبو لګونې، کانونو او پطرولیم، اطلاعاتو او کلتور، بدني روزنې او اریانا افغان هوایي شرکت مرستیالانو او رئیسانو ګډون درلود، عربي متحده اماراتو ته د افغانستان جلالتماب ولسمشر د سفر په څنډه کې د کلتور، کرنې، پوهنې او روزنې، انرژۍ او برېښنا، کانونو او لوبو په برخو کې هوکړه لیکونه لاسلیک شوي وو، په عملي کولو یې بحث او خبرې وشوې.
همداشان په دې ناسته کې د لوړو زده کړو، ګمرکونو، د پانګونې په دوه اړخیزه هڅونه او د حاجیانو د لېږد لپاره د اریانا افغان هوایي شرکت او اتحاد هوایي کرښې د همکاریو په هوکړه لیک چې لاسلیک ته چمتو دی بحث او د نظرونو تبادله وشوه او په هکله یې اړینې پرېکړې وشوې.
