په هیواد کي د لومړي ځل له پاره د پلټونکو ادارو او د مسلکي زده کړو بنسټونو ته د جواز ورکولو پروسه پیل سوه!

د مالي چارو د پلټني ادارې، په دولتي او خصوصي شرکتونو کي د پلټني (Audit) چاري ترسره کوي، چي موخي ئې د مالیاتو له تېښتي څخه مخنیوی، د مالي ستونزو رابرسیره کول او حلول، د مالي روڼتیا رامنځته کول او د مالي چارو معیاري کول دي.
لکه څرنګه، چي له کلونو راهیسي افغانستان د مسلکي محاسبینو له کموالي سره مخ وو، چي دغه کموالي د شرکتونو مالي چاري له ګڼو ستونزو سره مخ کړي وې؛ نو د همدې ستونزي د حل او د مسلکي محاسبې د پیاوړتیا په موخه، د مالیې وزارت د خزاینو لوی ریاست اړوند د افغانستان د مسلکي محاسبینو ادارې (CPA) د لومړي ځل له پاره پلټونکو ادارو او د مسلکي زده کړو بنسټونو ته د ټاکل سويو معیارونو سره سم، د ثبت او جواز ورکولو پروسه پیل کړه.
پلټونکو ادارو ته د معیاري جواز په ورکولو سره به، د دغه ادارو چاري مسلکي سي، د ملي عوایدو له تېښتي څخه به مخنیوی وسي، د امارتي او خصوصي شرکتونو په عوایدو کي به زیاتوالی راسي، په مالي او مالیاتي پروسو کي به بشپړه روڼتیا رامنځته سي او شرکتونه به د سیسټم جوړوني په برخه کي لا ډېر پیاوړي سي.