د نړیوال بانک کلنۍ ناستو په حاشیه کې د خوړو خوندیتوب په ګردي مېز کې د ماليې وزارت سرپرست ګډون
د مالیې وزارت نوماند وزیر او سرپرست ښاغلي عبدالهادي ارغندیوال د نړیوال بانک کلنۍ ناستو په حاشیه کې د خوړو خوندیتوب په ګردي مېز کې د ویډیو کنفرانس له لارې ګډون وکړ.
په دې ناسته کې چې د نړیوال بانک مرستیال او د غړو هیوادونو د ماليې وزیرانو ګډون کړی وو، د مالیې وزارت سرپرست په دې هیواد کې د کرونا ویروس له کبله په اقتصاد او ټولنیزو چارو د منفي اغېز او خوړو په خوندیتوب خبرې وکړې.
نوموړي وویل، چې د کرونا ناروغۍ (کوویډ-۱۹) د ټولو هیوادونو په هره سیمه کې پرته له دې چې اقتصادي او ټولنیز شرایط په پام کې ونیسي سترې روغتیایي، ټولنیزې او اقتصادي منفي اغېزې رامنځته کړي. افغانستان هم د نورو زياتو هیوادونو په څېر د دې ناروغۍ او خوړو خوندیتوب تر منفي اغېز لاندي راغلی. نوموړي زیاته کړه، پاملرنه مو وي چې د دې ټولو ستونزو سره سره، د افغانستان جغرافیایي وضعیت د بررسۍ له مخې، ځمکې، د کرنې په سکټور کې کاري ځواک او اقتصاد کې یې ونډه په دې هیواد کې د کرنې سکټور د پیاوړتیا او پراختیا لپاره د پام وړ فرصتونه لري.
د مالیې وزارت سرپرست، د دې ګردي مېز په پای کې په افغانستان کې د خوړو خوندیتوب زیاتولو په برخه کې د خصوصي سکټور د مالي تامین په اهمیت او ګټو ټینګار وکړ او ویې ویل، چې د عامه سکټور بودیجه نه شي کولی په یوازي ځان د کرونا منفي اغېز پراختیایي ستونزو ته ځواب ویونکي وي، له همدې کبله موږ ژمن یو څو د خصوصي سکټور د ودې لپاره لازم او مناسب اصلاحات رامنځته کړو او د کرنې سکټور په برخه کې د خصوصي سکټور بودیجه راجذب کړو.
