انټرکانټینینټل هوټل ته نوی رئیس ور معرفي شو
د مالیې وزارت د وړاندیز او ولسمشرۍ ماڼۍ عالي مقام د حکم پر بنسټ محمد شهریار مومند، د انټرکانټینینټل هوټل د رئیس په توګه د یاد وزارت د مالي او اداري عمومي رئیس سید احسان طاهري له لوري، د دې هوټل کارکوونکو ته ور وپېژندل شو.
په دې مراسمو کې د ولسمشرۍ ماڼۍ سلاکار جلاالدین سعید، د ستراتېژۍ او پالیسۍ ادارې معاون عبدالولي شرفزي، د تصدیو او دولتي شرکتونو عمومي رئیس ډاکټر میرویس بهیج او د انټرکانټینینټل هوټل یو شمېر کارکوونکو ګډون کړی وو.
د مالیې وزارت عمومي اداري رئیس د یاد هوټل د مخکني رئیس له کار کړنو د مننې ترڅنګ، نوي ګمارل شوي رئیس ته مبارکي وویله او په ورسپارل شویو چارو کې یې د بري غوښتنه ورته وکړه. هغه زیاته کړه، چې په دغه هوټل کې له ډېرو لوړو او ژورو سره، سره نن ورځ د پام وړ تغییرات ترسترګو کېږي، چې هیله مند یو د نوي رئیس په راتلو سره نور مثبت بدلونونه هم پکې رامنځته، په لګښتونو کې سپما وشي او ډېر عواید راټول کړي.
د انټرکانټینینټل هوټل رئیس په ده باندې د ولسمشرۍ ماڼۍ او مالیې وزارت له باور څخه مننه وکړه او ژمنه یې وکړه چې ورسپارل شوې چارې به په ښه توګه ترسره کوي. نوموړی د دې هوټل له کارکوونکو د همکارۍ غوښتونکی شو.
