د مالیې وزارت سرپرست د هيواد د شمال له سوداګرو سره وکتل
د مالیې وزارت سرپرست الحاج ملا هدایت الله بدري، د هیواد دشمال د خصوصي سکتور د سوداګرو له استازو سره د مالیې په وزارت کي وکتل.
په دې لیدنه کي د سوداګرو استازو د مالیې وزارت سرپرست ته خپلي ستونزې او وړاندیزونه په ډاګه کړل او زیاته یې کړه، چي موږ ته د صنعت او سوداګرۍ په برخه کي له تېر نظام څخه زیاتي ستونزي او خنډونه په میراث را پاتي وو، خو د اسلامي امارت له راتلو سره زموږ ستونزي تر ډېره حل سوي دي، ولي په ځینو برخو او د زیاتو اسانتیاوو برابرولو کي د افغانستان اسلامي امارت په ځانګړې توګه د مالیې وزارت رهبرۍ د ملاتړ غوښتونکي یو.
د مالیې وزارت سرپرست، د دوی شتون او فعالیتونو ته په اشاره وویل: ستاسو فعالیتونه او رول د هیواد د پرمختګ او اقتصادي ودي په برخه کي د پام وړ اهمیت لري، د افغانستان اسلامي امارت په ځانګړې توګه د مالیې وزارت له تاسو سره هر وخت همکار دئ او تاسو ته د اسانتیاوو په برابرولو کي له شته امکاناتو کار اخلي او د هیواد د نافذه قوانینو په چوکاټ کې ستاسو ستونزو ته رسېدنه کوي.
د یادو ټولنو استازو، د مالیې وزارت له سرپرست سره ژمنه وکړه، چي موږ به د هیواد د اقتصادی پرمختګ په برخه کي له تاسو سره اوږه پر اوږه درېږو او ترڅنګ به خپله مالیه پر ټاکلي وخت د دولت خزانې ته سپارو
د یادونې وړده، چي تېره ورځ د عوایدو او ګمرکونو مرستیال ملا ناصر اخند هم د یادو ټولنو له استازو سره پر اړوندو موضوعاتو لیدنه او خبرې کړي وې.
