د عوایدو د برېښنايي کېدو درې اړخیزه هوکړه لاسلیک سوه
د مالیې وزارت، افغانستان بانک او د احصایې او معلوماتو ملي ادارې تر منځ د عوایدو برېښنايي کېدو هوکړه لیک د حکومت د رسنیو په مرکز کي لاسلیک سو.
په همدې تړاو جوړه سوې غونډه کي د مالیې وزیر الحاج ملا هدایت الله بدري، د افغانستان بانک رئیس عبدالقهار (حاجي ادریس) د احصایې او معلوماتو ملي ادارې رئیس ډاکټر فقیر محمد زیار، د مالیې وزارت د عوایدو لوي رئیس معراج محمد معراج، د اړوندو ادارو یو شمېر مسؤلینو او رسنیو ګډون کړی وو.
په پیل کي د مالیې وزیر الحاج ملا هدایت الله بدري وویل: ملي عواید د هيواد د پرمختګ او مالي خپلواکۍ لپاره په بدن کي د ويني حيثیت لري، د عوایدو راټولو معلوماتي او مدیریتي سیسټم پیوستون د غوره حکومتولۍ پر لوري مهم ګام دئ. دغه چاره به د برېښنايي عوایدو په راټولو کي د شفافیت لامل وګرځي او د عوایدو په راټولو کي به اړیني اسانتیاوي رامنځته کړي.
د احصایې او معلوماتو ملي ادارې رئیس ډاکټر فقیر محمد زیار هم د عوایدو پر بانکي کېدو ټینګار وکړ او وې ویل: ټول عواید باید په شفاف ډول د سیسټم له لاري راټول سي، تر څو په دې برخه کي په ملي کچه لازمه روڼتیا رامنځته سي.
د افغانستان بانک د تادیاتو سیسټم امر اسدالله شفق وویل: افغانستان بانک د یاد هوکړه لیک ټولو اصولو ته ژمن دئ او دغه چاره د ملي عوایدو د لا شفافیت په برخه کي یو ښه ګام بولو او هڅه کوو، ترڅو له نورو دولتي ادارو سره هم ورته هوکړه لیکونه لاسلیک کړو.
د یادوني وړده چي برېښنایي حکومتولي د نظامونو د پرمختګ او اوسني عصر لومړیتوب دئ، ملي عواید چي په برېښنایي ډول را ټولېږي، مثبت اغېز یې پر ملي بودیجه پرېوزي او د فساد کچه صفر ته را ښکته کوي.
