پر صادراتي او وارداتي توکو د تعرفې ټاکل د مالیې وزارت صلاحیت دئ
په هر هیواد کي چي صادرات او واردات ترسره کېږي، پر سوداګریزو توکو باندي د دولت له لوري تعرفه ټاکل کيږي، چي بیا دغه ټاکل سوې تعرفه په بازار کي د توکو په بیه او کورني صنعت نېغ په نېغه اغېز کوي.
کله چي د تعرفې کمېټې له خوا تعرفه ټاکل کيږي، زیاتي پاملرني، محاسبې او د کورنیو او بهرنیو بازارونو ارزښت په پام کي نیول کېږي. مالیې وزارت هم د تعرفې ټاکلو لپاره لاندني ټول اصول او میکانیزمونه په ډېر دقت سره په پام کي نیولي دي:
لومړی: د ګمرکونو عمومي ریاست کي د تعرفې ریاست د صادراتي او وارداتي توکو بیه تحلیلوي، کورنی تولید، له هیواد بهر او دننه په بازارونو کي غوښتني او وړاندي کول (عرضې) څېړي.
دوهم: څېړونکې ډله بیا د څېړنو پایلي د تعرفې کمېټې ته وړاندي کوي، چي د تعرفې وروستی نرخ وټاکي.
د تعرفې د کمېټې مشري د مالیې وزارت د عوایدو او ګمرکونو مرستیال پر غاړه لري، چي د صنعت او سوداګرۍ، اقتصاد، کرنې، اوبو لګولو او مالدارۍ او د کانونو او پطرولیم وزارتونو مرستیالان او د افغانستان د سوداګرۍ او صنایع خونې رئیسان د کمېټې غړيتوب لري.
له تائید وروسته د تعرفې بیه د منظورۍ په موخه د مالیې وزیر ته وړانديز کيږي، د مالیې وزیر له منظورۍ سره سم ټاکل سوی قیمت په سیسټم کي ځای پر ځای کيږي، چي هم مهاله په ټولو ګمرکونو کي د پلي کېدو وړ وي.
د یادوني وړ ده، چي د تعرفې کمېټې د کړنو راپور په کال کي دوه ځله (د لومړیو او دویمو شپږو میاشتو) د ارزوني په موخه اقتصادي کمیسیون ته وړاندي کيږي.
