د کوچنیو مالیه ورکوونکو ریاست کارکوونکو ته پر عایداتو د مالیاتو قوانینو په تړاو روزنیز ورکشاپ پیل سو
د مالیې وزارت بشري سرچینو ریاست له لوري او د عوایدو لوی ریاست په همکارۍ د کوچنیو مالیه ورکوونکو ریاست کارکوونکو ته پر عایداتو د مالیاتو قوانینو او اړوندو کړنلارو په تړاو شپږ ورځنی روزنیز ورکشاپ پیل سو.
په دې تړاو جوړه سوې ناسته کي، چي د ګمرکونو او عوایدو په ملي اکاډمۍ کي ترسره سوه، د بشري سرچینو رئیس مولوي احمد شاه شاکر، د عوایدو عمومي ریاست حمایوي مرستیال حافظ شاه حسین حسیني او د دې ریاست یو شمېر نورو کارکوونکو ګډون کړی وو.
ښاغلي شاکر په خپله پرانیستې وینا کي وویل، چي تاسو د دغه اسلامي نظام کارکوونکي یاست او دوه مسؤلیته لرئ، چي یو ستاسو مسلکي مسؤلیت او بل هم ستاسو دیني مسؤلیت دئ. هڅه وکړئ خپل مسلکي مسؤلیت د همدې پروګرامونو د مسلکي زده کړو ترلاسه کولو له لاري لاسته راوړئ، خپله وړتیا لوړه کړئ او د هغه بست حق ادا کړئ، چي اشغال کړی مو دئ. ستاسو دیني مسؤلیت؛ دې مقدس نظام ته خدمت کول او په ریښتینې توګه د شهیدانو د ارمانونو پوره کول دي.
د عوایدو لوی ریاست حمایوي مرستیال حافظ شاه حسین حسیني وویل، چي الله تعالی ټول مخلوقات د خپل عبادت لپاره پیدا کړي دي. عبادت هم بېلابېل ډولونه لري، کار او کسب او د حلالي روزۍ پیدا کول هم په عبادتونو کي راځي. په دغه اسلامي نظام کي کار کول او د معاش ترلاسه کول، وخت پېژندنه او د مشرانو اطاعت کول هم غوره عبادات دي. که تاسو خپله وړتیا لوړه کړئ، کولای سئ حق او باطل، حلال او حرام تشخیص کړئ او خپل کارونه په ښه توګه ترسره کړئ.
ناسته د دعایې په ویلو سره پای ته ورسېده او درسونه ئې پیل سول.
