د ګمرکونو لوی رئیس هرات ولایت ته سفر وکړ!
د ګمرکونو لوی رئیس هرات ولایت ته سفر وکړ
د ګمرکونو لوی رئیس الحاج مفتي عبدالمتین سعید، چي د تخنیکي پلاوي په مشرۍ هرات ولایت ته تللی، د والي شیخ الحدیث مولانا نور احمد اسلام جار په شتون کي ئې د هرات ولایت له یو شمېر سوداګرو او صنعتکارانو سره وکتل.
په دې لیدنو کي، چي د ګمرکونو لوی ریاست د قانون د تنفیذ رئیس ښاغلي محمد ابراهیم خلیل، د نوموړي ملتیا کوله د ګمرک رئیس هم ګډون درلود. په پیل کي د یاد ولایت سوداګرو او صنعتکارانو په خپل وار سره په بازارونو کي د سالم رقابت او د صنعتي فابریکو د ملاتړ په موخه د قاچاقي توکو د مخنیوي، د پاکستان لاس موټرو په واردولو باندي بندیز، د اسلام کلا په سرحدي ګمرک کي د سوداګریزو توکو د طی مراحلو، د هرات ګمرک د کاري مودې زیاتولو او په کور دننه تولیدېدونکو توکو د تعرفې د لوړېدو په برخو کي خپلي ستونزي او وړاندیزونه د ګمرکونو له لوی رئیس سره شریک کړل.
د ګمرکونو لوی رئیس د دوی د ستونزو او وړاندیزونو له اورېدو وروسته وویل، چي د ګمرکونو لوی ریاست د هیواد په کچه د قاچاقي توکو د مخنیوي لپاره ټول اړین تدابیر نیولي دي، چي یوازي د روان کال په لومړیو شپږو میاشتو کي شاوخوا (۹۴) زره ټنه قاچاقي توکي نیول سوي دي. نوموړي د سوداګرو او صنعتکارانو د ځینو ستونزو د حل لپاره د هرات ګمرک مسؤلینو ته لازم هدایات وکړل او دوی ته ئې ډاډ ورکړ، چي پاته ستونزو ته به ئې هم شته امکاناتو ته په کتو ژر رسېدنه وسي.
د ګمرکونو لوی رئیس په دې سفر کي د هرات محصولي او اسلام کلا سرحدي ګمرک چاري له نږدې و ارزولې او په کاري برخه کي ئې د کارکوونکو د ستونزو اورېدو تر څنګ د چارو د لا ښه والي لپاره د یاد ګمرک مسؤلینو او کارکوونکو ته لازم هدایات هم وکړل.
