د افغانستان او ترکمنستان ترمنځ د مالیاتي او سوداګریزو مسایلو په تړاو د مذاکراتو لومړی پړاو ترسره سو!
د افغانستان او ترکمنستان هیوادونو د مالیاتي چارو د مسؤلینو ترمنځ د مضاعف (دوه ځله) مالیاتو د نه اخیستلو او اړوند نورو مهمو مسایلو په اړه، د مخامخ مذاکراتو لومړی پړاو، د مالیې وزارت د عوایدو او ګمرکونو په معینیت کي ترسره سو.
په دغه درې ورځنیو مسلسلو مذاکراتو کي، چي د مالیې وزارت د مالیاتي، تخنیکي، حقوقي او د پالیسۍ چارو مسؤلینو او د ترکمنستان هیواد د مالیې او اقتصاد وزارت د مالیاتي سیسټم او پراختیایي بودیجې د کارپوهانو رئیس، د مالیاتي او حسابي پالیسۍ مرستیال او په افغانستان کي ددې هیواد د سفارت استازي ګډون کړی وو؛ د دواړو هیوادو ترمنځ د مضاعفو (دوه ځله) مالیاتو د نه اخیستلو، د سوداګریزو اړیکو د پراختیا، د پانګوني پر زیاتوالي، د مالیاتي تېښتي د مخنیوي او په یادو برخو کي د دوه اړخیزو اسانتیاوو پر رامنځته کولو مفصل بحثونه وسول او دواړي خواوي پر لومړنۍ چمتو سوي مسؤدې باندي هوکړې ته ورسېدل.
ددې مذاکراتو بل پړاو به په نږدې راتلونکي کي د دواړو هیوادونو د لوړپوړو مالیاتي مسؤلینو ترمنځ ترسره سي.
