د مالیې وزیر د افغانستان د نفت او ګازو سرتاسري اتحادیې له مسئولینو سره وکتل!
د مالیې وزیر الحاج ملا محمد ناصر اخوند د هیواد د سوداګرۍ او پانګوني خوني له سرپرست محمد یونس مهمند او د افغانستان د نفت او ګازو شرکتونو د سرتاسري اتحادیې له رئیس سید کریم هاشمي سره وکتل.
په دغه کتنه کي، د نفت او ګازو د سرتاسري اتحادیې رئیس له مالیې وزارت څخه مننه وکړه، چي دوی ته ئې د ګمرکونو په سیسټم کي اسانتیاوي برابري کړي دي.
ښاغلي هاشمي خوښي څرګنده کړه، چي له دې وروسته د نورم او سټنډرډ ادارې د نفت او ګازو اړونده برخه د مالیې وزارت تر اثر لاندي فعالیت کوي، چي ورسره به د نفت او ګازو شرکتونو ته په اړونده برخه کي لا ډېري اسانتیاوي رامنځته سي.
د مالیې وزیر وویل، چي په هیواد کي ټول سوداګر او د نفت او ګازو شرکتونو مسئولین هر وخت په ډاډه زړه کولای سي خپلي ستونزي او غوښتني له مالیې وزارت سره شریکي کړي او دغه وزارت هم تل هڅه کوي چي دوی ته په اړوندو برخو کي لا ډېري اسانتیاوي برابري کړي.
