د اسلام کلا ګمرک له پاره د موټرونو د تمځای جوړولو چاري (۴۰) سلنه مخته تللي دي!
د غویي ۳۱مه ۱۴۰۴هـ.ل
د مالیې وزارت د ګمرکونو لوی ریاست له لوري د هرات ولایت د اسلام کلا په ګمرک کي د (۲۳۲) میلیونه افغانیو په ارزښت د موټرونو د تمځای جوړولو پروژې رغنیزي چاري تر دې مهاله (۴۰) سلنه مخته تللي دي.
د موټرونو یاد تمځای، چي په (۳۷) جریبه ځمکه کي په معیاري کانګرېټي بڼه جوړېږي د اور وژني د سیسټم ترڅنګ د برېښنايي اسانتیاوو درلودونکی هم دئ.
د دې پروژې په پلي کېدو سره به موټر چلوونکو، سوداګرو او د سوداګریزو توکو د تشرېح په برخه کي د ګمرک کارکوونکو ته ګڼي اسانتیاوي برابري سي.
د یادولو وړ ده، چي د یادي پروژې لګښت د مالیې وزارت له پراختیایي بودیجې څخه ورکول کېږي او د رغوني چاري ئې د ملي پراختیا شرکت له لوري ترسره کېږي.
