د کرنیزو صنایعو چوکاټ لومړنۍ ناسته وشوه
د مالیې وزارت سرپرست او د زېربنا په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، په مشرۍ د چنګاښ میاشتې په ۵ مه نېټه د کرنیزو صنایعو چوکاټ لومړنۍ ناسته په ولسمشرۍ ماڼۍ کې جوړه شوه.
په دې ناسته کې چې د اوبو لګونې، کرنې او مالدارۍ وزیر ښاغلي نصیر احمد دوراني، د صنعت او سوداګرۍ سرپرست ښاغلي اجمل احمدي، د افغانستان لپاره د نړیوال بانک رئیس ښاغلي شبهام چوهدري، د افغانستان د مرسته کوونکو بنسټونو استازو او د اړوندو ادارو یو شمېر مسؤلینو ګډون کړی وو، د کرنیزو صنایعو په چوکاټ، کرنیزو تولیداتو په وضعیت، د کرنیزو محصولاتو د اغیزمن تامین لپاره د یوه ځنځیري مډل په وړاندې کولو، د کرنیزو محصولاتو د کیفیت په ښه کېدو، د دې سکټور په مالي مدیریت، په دې برخه کې د حکومت او مرسته کوونکو په پانګونه، د باریک آب، بلخ، ننګرهار او هرات کرنیزو پارکونو په پراختیا، د کرنیزو صنایعو په برخه کې د پانګونې فرصتونو رامنځته کولو په زیاتېدو او د امید پروژې په پراختیا، د کرنیز سکټور له لارې په کارموندنې، د کرنیزو صنایعو لپاره د وړ چاپېریال په رامنځته کېدو او یو شمېر نورو اړوندو مسایلو په تړاو خبرې او د نظرونو تبادله وشوه.
