د مالیې وزارت سرپرست د ملګرو ملتونو سازمان د پراختیایي پروګرام (UNDP) له اقتصادي کارپوهانو سره د پایداره پراختیایي موخو سره سم د افغانستان د اقتصادي پروګرامونو د همغږي کولو په موخه ولیدل

د مالیې وزارت سرپرست او د زېربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، د زمري میاشتې په ۸ مه نېټه د ملګرو ملتونو سازمان د پراختیایي پروګرام (UNDP) له اقتصادي کارپوهانو سره په مالیه وزارت کې وکتل.
د مالیې وزارت سرپرست په دې لیدنه کې له هغوی سره د ملګرو ملتونو د پایداره پراختیا په موخو، له پایداره پراختیا سره د افغانستان د اقتصادي پروګرامونو په همغږي کولو، د افغانستان د مالي سکټور په اصلاحاتو، له پایداره پراختیا سره په همغږۍ د بودیجې په جوړونه، د یوې ګډې کمېټې په جوړېدو چې وکولی شي په افغانستان کې پایداره پراختیا پیاوړي کړي، د بڼوالۍ او کرنې په برخه کې په سترې پانګونې او هغو پروګرامونو چې ځان بسیاینې ته د رسېدو لپاره له افغانستان سره مرسته کوي، په عوایدي سرچینو کې د پراخو اصلاحاتو په پلي کولو او یو شمېر ورته مسایلو په تړاو بحث او د نظرونو تبادله وکړه.
د ملګرو ملتونو سازمان د پراختیایي پروګرام اقتصادي کارپوهانو وویل، چې د کورنیو تولیداتو لوړولو او صادراتو زیاتولو له لارې افغانستان کولی شي پایداره اقتصادي ودې ته ورسېږي.

د مالیې وزارت سرپرست وویل، چې موږ د ملي بودیجې په ترتیب کې لومړیتوب لرونکي پروګرامونه چې د هیواد له اقتصادي ودې سره مرسته کوي او همداشان بېوزلۍ کموي په پام کې نیسو. نوموړي زیاته کړه، چې پایداره اقتصادي وده په هیواد کې هغه وخت راتلی شي، چې موږ په ټول هیواد کې انرژۍ ته لاسرسي ولرو، له همدې کبله د افغانستان حکومت په دې لاره کې زیاتې هڅې کوي څو د افغانستان د برېښنا ټولې جزیرې په راتلونکو دوو کلونو کې په یوه ملي واحده شبکې پوري وتړي.