د کیفیت کنټرول ریاست کارکوونکو له پاره د کیفیت کنټرول مسلکي کولو روزنیز پروګرام پیل سو!
د وږي۹مه ۱۴۰۴ هـ.ل
د مالیې وزارت د کارکوونکو چارو ریاست د عوایدو او ګمرکونو معینیت د کیفیت کنټرول ریاست کارکوونکو له پاره د کیفیت کنټرول مسلکي کولو تر سرلیک لاندي روزنیز پروګرام ترسره کړ.
په همدې مناسبت جوړه سوې غوڼده، چي د عوایدو او ګمرکونو ملي اکاډمۍ د کنفرانسونو په تالار کي جوړه سوې وه، د دعوت او ارشاد رئیس مولوي عبدالهادي سیف الخالد، د روزني او ظرفیت لوړولو آمر مفتي عبدالوهاب عابد او د کیفیت د کنټرول آمر مولوي مطیع الله مطیع پکښي ګډون کړی وو.
د کارکوونکو چارو ریاست د روزني او ظرفیت لوړولو آمر د پروګرام په پرانیستي وینا کي وویل، چي د نفتي موادو د کیفیت کنټرول له ډېر اهمیت څخه برخمن دئ، چي د ککړتیا یا زهرجنو موادو د خپرېدو د خطرونو په کمولو کي خورا اغېزمن تمامېږي او د صنعتي تجهیزاتو ګټه اخیستنه زیاتوي؛ نو له همدې کبله د نفتي موادو لابراتوارونو کیفیت ښه کولو په موخه له دې پروګرام څخه بشپړه ګټه پورته کړئ.
د کیفیت کنټرول آمر په خپلو خبرو کي وویل، چي دا پروګرام د لابراتوار په څانګه کي د مسلکي کسانو د پوهي او مهارتونو د لا پیاوړتیا له پاره پیل سوی دئ او د نفتي مواد د لابراتوارونو د کیفیت کنټرول، شفافیت ډاډمنولو او دقیقي څارني په برخه کي مهم رول لري. نوموړي له ګډونوالو وغوښتل؛ ترڅو له دې ارزښتناک فرصت څخه د پوهي د تر لاسه کولو په موخه ګټه پورته کړي او په عملي توګه ئې په خپل کار ځای کي پلي کړي.
د دعوت او ارشاد رئیس ګډونوالو ته وویل، سره له دې چي له دې پرګرام څخه د معیاري کولو په موخه ګټه پورته کوئ، تاسو باید اسلامي ارزښتونه؛ لکه: عدالت، د نورو حقونو ته درناوی، صداقت، رحم او مهرباني، د اړمنو ملاتړ، تقوا او پرهېزګاري، پیوستون او همکاري هم مراعت کړئ.
د یادوني وړ ده، چي دا پروګرام (۱۷) ورځي دوام کوي او ګډونوالو ته د تېلو او ګازو مباني، د کیفیت کنټرول اصول او مفکورې، د ازمویني تجزیې او تحلیل مېتوډونه، د کیفیت ښه کولو مېتوډونو بررسي او نور اړوند او اړین موارد تدریس کېږي.
