د بلخ سېلو دولتي شرکت
د بلخ سېلو دولتي شرکت د رغوني چاري په ۱۳۶۲ل کال پیل او په ۱۳۸۵ل کال پای ته ورسېدې او په فعالیت یې پیل وکړ. دغه شرکت له درو اساسي او نورو اداري مرستندویه برخو څخه جوړ دئ.
الیواټر یا د غنمو زېرمه تون
په دغه زېرمه تون کي په یوه مهال څلوېښت زره مټریکه ټنه غنم خوندي او له پاکېدو او پروسس وروسته کولای سي دغه غنم د اوږدې مودې لپاره وساتل سي او په بېړنیو حالاتو کي ګټه ترې واخیستل سي.
ژرنده
د ژرندې برخه په څلروېشتو ساعتونو کي د لومړۍ او دویمې درجې سل مټریک ټنه اوړو د تولید وړتیا لري، چي یوه اندازه د سېلو په دننه کي د ډوډۍ پخولو او پاته برخه یې په داخلي مارکېټونو کي پلورل کېږي.
د ډوډۍ پخولو فابریکه
د فابریکې دغه برخه په څلروېشتو ساعتونو کې د ۲۵ ټنه ډوډۍ، کیک او کلچو تولیدولو وړتیا لري. د پورتنیو ذکر سوو ماشینونو ترڅنګ یوه پایه نوی ماشین هم فعالیت ترسره کوي، دغه ماشین په ۲۴ ساعتونو کي د دوه ټنه ډوډۍ، روټ، کیک او کلچو تولیدولو وړتیا لري.
مرستندویه برخي
په دې برخه کي د بخار تولید، لابراتوار، د غلو دانو قبول، تله، ټرانسپورټ، ورکشاپ او اداري څانګي شاملي دي.
یادونه
د افغانستان اسلامي امارت د ځیرک اقتصادي سیاست او بلخ سېلو دولتي شرکت د مشرتابه پلاوي او مسلکي کارکوونکو د هڅو په پایله کي د دې سېلو د ډوډۍ پخولو لومړنی فاز له دېرش کلن ځنډ وروسته یو ځل بیا په کار پیل وکړ او په دغه فابریکه کي بېلا بېل ډوله کیک، کلچې، ناشتې او روټ پخېږي. د دې شرکت د یادي برخي له فعالېدو سره پنځوسو کسانو ته او د تولید د پراخېدو په صورت کي له ۳۰۰ زیاتو کسانو او ځوانانو ته په مستقیم او غیز مستقیم ډول د کار زمینه برابروي.
